【大肚瑜伽】董敏莉產檢發現肌瘤 跟BB共存子宮

陀B約5個多月嘅董敏莉(Monie),早前跟律師老公莊耀金去咗大阪享受Baby Moon,由於佢個肚開始天天脹大,所以有時會腰痠背痛,行多了會攰同抽筋,但距離「卸貨」仲有起碼4個月,Monie開始諗計改善,佢聽好多孕媽媽分享不妨做吓大肚瑜伽,於是佢就去向瑜伽導師如楓拜師。

已有兩孩子嘅瑜伽導師如楓,好了解孕婦身體狀況變化,佢為Monie設計咗幾式,針對紓緩佢腰痛,同時又可以鬆鬆筋骨。當中包括有貓式、扭轉式、戰士式同樹式,動作比較容易,難度唔高,初學嘅Monie輕鬆做到。

問到Monie依家陀B情況?佢話:「依家5個半月,我開始feel到有啲攰,有時會腳會少少抽筋,可能啲筋緊啲,老公有同我『鍊』吓。我哋啱啱去完大阪旅行,行好多街,腳有啲腫,我又唔敢搽按摩膏,休息為主。」

Monie雖然零陀B經驗,但佢知道孕情緒都好重要,「我每日都好開心,我仲買咗BB心跳機,平日一周聽一、兩次,但去旅行會擔心啲,每日都聽。每日都同BB傾偈,去景點,出街都同佢講。BB喺20周已識聽嘢,佢開始接收聲音,我都有播歌佢聽。今日嚟訪問做瑜伽,我都有同BB講。」

Monie話未feel到BB喺肚中踢嘅感覺,「反而有彈吓彈吓,可能佢仲好細隻,未有話胎動,遲啲先會,醫生話佢依家喺我肚中游水。」Monie話初孕有嘔得好犀利,佢話:「又嘔又食唔到,瞓唔好,依家情況穩定番,初初有幾個月,我停晒冇做運動,成日瞓,依家BB開始大,人會易攰,頸開始緊,所以今日做吓瑜伽,拉吓筋係好啲,我都會盡量keep住做吓。」

BB預產期喺12月初,但Monie卻有預感BB會提早出嚟,話唔定同佢一樣喺11月尾生日。Monie未決定剖腹定順產生B,「第一次產檢,醫生話發現我有子宮肌瘤,佢嘅位置近產道,可能冇得揀順產,但醫生話有機會會改變,可以遲啲先決定。依家每次產檢,都會睇下肌瘤大細,暫時BB喺上面,肌瘤喺下面,唔會影響大家。開頭知道子宮有個肌瘤,我都驚,我有上網睇肌瘤對BB有乜嘢影響,好彩位置唔影響,只影響生產方法,都OK。」

Monie老公一早答應陪老婆入產房打氣,「佢要剪臍帶。」好多星爸爸剪過臍帶,佢哋都形容似「剪豬腸」,Monie話:「佢未練,佢有問我,我都聽講唔容易剪。」Monie夫婦都鍾意小朋友,但因為肚中嗰個未出世,佢唔敢決定幾時再追多個,「生咗呢個先,呢幾個月以嚟,每日都有唔同感覺,係開心嘅,但唔同階段,去產檢時都有唔同嘅擔心,生咗一個先再諗。媽咪已經催定我再生,心急過我。」

身形瘦瘦嘅Monie個肚唔算大,佢話只係重咗5、6磅,係正常標準,「之前成日嘔,體重輕咗,呢排有返胃口,體重先追番,我陀B後胃口少少變咗,我鍾意食皺皮瓜,尤其鍾意食水果,只係戒口唔食生嘢。」Monie已開始買嬰兒用品,佢話:「買咗BB衫、奶樽、嬰兒車同玩具,得閒就買。」Monie話坐月有媽咪幫手,但佢會想學自己湊BB,「依家同老公喺屋企,用公仔模擬真BB,學吓點抱同換尿片。」

採訪:陳杰
攝影、攝錄:沈建程
場地:eliment FitLax(V-Point)
服裝:Fila

 


陀B五個月董敏莉學做大肚瑜伽 攝影:沈建程


董敏莉跟導師如楓(右)學做大肚瑜伽紓緩筋骨。


董敏莉做貓式瑜伽。


董敏莉做side stretching。


董敏莉示範戰士式,兩腳打開蹲下吸氣,眼望指尖,雙手放平。


董敏莉做完一小時瑜伽後,筋骨鬆了不少。


董敏莉指產檢時發現有子宮肌瘤。


董敏莉盤起雙腳做扭轉式,呢個動作要注意腰背挺直。


董敏莉前年嫁給律師老公莊耀金,今年底二人世界將添新成員(資料圖片)

 

資料來源: https://hk.entertainment.appledaily.com/enews/realtime/article/20180820/58571879