【得返四年】想50歲參加健美比賽 杜汶澤戒酒積極備戰

杜汶澤同鄭中基今日喺北角出席一間健身中心開幕,同場仲有余曉彤、李靜蓮、吳海昕、王貽興等。見阿澤隔住T裇都騷到胸肌,現時170磅嘅佢就話:「陳奐仁教人健身,見佢咁fit,我好羨慕,我都想參加健身界,0依家目標係50歲參加健美比賽,我用4年時間積極備戰,戒酒、食烚雞肉同菜。」

提到阿澤將同盤菜瑩子合作舞台劇《我殺死了尊貴客戶》,不過佢老婆田蕊妮喺社交平台指,曾向阿澤講過有朋友要訂飛,不過阿澤嘅助手指阿澤冇講過,搞到阿田0依家好煩惱,阿澤話:「冇辦法,我做戲,唔係賣飛,我都唔會打畀鄭中基攞飛啦,我都係炒黃牛,都係上網㗎。」鄭中基笑指:「佢上網,循正途,send email畀我攞飛。」阿澤表示:「我好守規矩㗎,有條link㗎!」

鄭中基喺明年農曆新年期間開個唱,佢現時亦要練氣、練線條,「上次我太重,落台握手,返上去有啲喘氣,因為嗰段時間我要增30磅拍戲,今次要減番30磅。」農曆新年檔可以逗利是,佢即刻話:「講都冇人信,呢個唔係一個好檔期,冇人要,咪我要囉!」阿澤笑佢:「佢意思係個期咁差都爆,兜細細個圈讚自己。」問到鄭中基有冇欠飛債?佢笑住話:「我已經冇聽電話好耐。」阿澤認為唔可以隨便應承,如有事就推畀助手。

 


攝影:沈健程


杜汶澤同鄭中基今日喺北角出席一間健身中心開幕

 


阿澤隔住T裇都騷到胸肌

 


阿澤話:「依家目標係50歲參加健美比賽。」


鄭中基喺明年農曆新年期間開個唱,佢現時亦要練氣、練線條


農曆新年檔可以逗利是,佢即刻話:「講都冇人信,呢個唔係一個好檔期,冇人要,咪我要囉!」


阿澤笑佢:「佢意思係個期咁差都爆,兜細細個圈讚自己。」

資料來源: 蘋果日報