【煮住家菜綁老公胃】林夏薇練腰力準備陀B 家庭計劃生夠三個

七年之癢。

31歲嘅林夏薇喺11年簽約無綫,服務咗7年,今年6月約滿離巢。

離開原因,有指林夏薇想將重心放喺家庭,佢15年嫁畀身家逾20億金融才俊莫贊生(Jason),兩夫妻恨添丁,林夏薇決定利用呢段時間調理身體,準備隨時造人。

從前日以繼夜拍劇,林夏薇越捱越瘦,變成「紙版人」,老公肉赤,回復自由身,林夏薇時間多了,可以天天去運動,強健體魄。「調理又唔係完全為咗生BB,只係為健康,生BB係我家庭計劃一部份,係咪要擺好重?好似好大壓力,家人冇催,至緊要我健康。」

問林夏薇恨唔恨生B,佢衝口而出:「都恨。」佢話依家跟同學聚會,因為好多都做咗媽咪,所以大家話題不離湊仔經,「佢哋講嘅話題係返學同湊小朋友,又話去邊度遊樂場好玩,佢哋又會玩番啲兒童遊戲,我最近同佢哋玩,發現唔識玩,生一個可以學。」林夏薇已做好心理準備隨時生B,佢心目中也有家庭計劃,「我想要三個,兩至三都得,因為我自細係獨女,得我自己一個,細個時好悶,冇乜嘢玩,我鍾意有兄弟姊妹一齊玩,熱鬧啲,仔女都冇所謂,仔女都鍾意,又可以一齊玩,可以多啲人一齊跑來跑去。我自己本身好鍾小朋友,屋企人本身冇催,反而我有朋友催。」

現在多了時間盡人妻責任,林夏薇得閒就會為老公下廚,「我比較鍾意網絡上搵啲新菜式,先生話我係『網絡廚神』,我好鍾意網上搵新菜式,自己再鑽研吓。」林夏薇住家菜食到老公舔舔脷,近日撚手小菜係「麻辣乾鍋」:「我唔係好食辣,但唔食都願意食多兩碗飯,製法係將菜放啲麻辣醬料,放入鍋去焗去炒,好簡單唔難。」林夏薇嘅廚藝除咗留住老公個胃,仲留埋佢個人同個心:「我先生即使出面有應酬,如果佢知我喺企煮嘢食,都會返嚟同我食一餐飯,再出去同人食第二餐飯,佢都畀面,都開心嘅,食得係福。咁我又冇話要日日煮,我周不時心情好,突然好想去買餸就煮,我煮親嘢,廚房好大陣仗。」睇番林夏薇社交網,原來佢仲識整pizza同親子丼。

「我係巨蟹座,比較居家,屋企排咗第一先,我都熱愛演藝事業,想事業同家庭之間拎個平衡點,其實幾難,依家仲有生意上要親力親為,比較難啲同一時間去做咁多嘢,所以依家點都家庭行先,自己生意排第二,演藝事業最好唔好大困身,唔好冇時間安排自己嘢。」

林夏薇現在多了時間,佢安排每天做運動拉筋,佢話想強化肌肉,練定腰力陀B?佢話:「我想練番條腰firm啲,想強壯番少少。之前太瘦,增肥增得多又唔得,想練肌肉,練個shape,好瘦又唔想,先生都覺得我太瘦,當然佢心目中想我肥番啲,我要練番大隻少少。」訪問當日,佢就由教練Chris指導幾招收腹同收身體線條。

林夏薇剛跟老公慶祝了結婚三周年,佢哋會互相體諒,「食咗一餐飯,原本佢要飛,但專登同我食一餐飯,改晒所有期,我哋兩人之間過好簡單生活。以前大家都好忙,但都願意攞時間出嚟溝通,我拍劇好夜收工,佢會等我,有時我4、5點又開工,佢都好早做嘢,等我好辛苦,我返嚟又嘈醒佢,其實係惡性循環。大家同屋住,冇乜一齊食飯,我節日又要開工,有時菜未上又話要走,掉低佢,但佢又冇投訴嘅,佢可了解我,知我好鍾意自己工作。咁先生同樣熱愛自己工作,我亦好支持佢,兩人互相理解。」

林夏薇經營點心店越開越多,生意已上軌道,佢話:「依家好多人嚟同我傾合作,想加盟入股,亦有投資傾合作,內地、美國、泰國、馬來西亞同新加坡等,好多人嚟同我哋傾合作,睇吓合唔合作到。」下一步想上巿嗎?「我做生意冇考慮呢啲嘢,自己仲係學嘅階段,我比較鍾意腳踏實地嘅感覺。」

採訪:陳杰
攝影、攝錄:沈建程
髮型:Ivan Lee of Headquarters
化妝:江中平化妝室
場地:Eliment FitLax

資料來源: https://hk.entertainment.appledaily.com/enews/realtime/article/20180816/58555273